Gabonart martxan

        Bilboko Gabonak ez lirateke Gabonak izango Artisautza Azokarik gabe. Aurten Gabonart azokak 10 urte beteko ditu izen horrekin eta Arbaso Euskal Artisautza Tradizionalaren Bizkortzeko Elkarteak antolatuta, eta 40. urtea izango da Gabonetako Artisautza Azoka izenarekin, beraz, Bilbokoa hitzordu nagusia izango da datozen egunotan.

          Aurtengo azoka biribil eta berezi honetan, Gabonartek bere distira guztia zabalduko du Areatzako Kaian dagoen karpan. Horretarako ospe handiko 55 profesional beren tailerretatik aterako dira, haien produktuak ezagutarazteko. Hiriko alkateak, Juan Mari Aburtok, inaugurazio zinta moztu du, eta berarekin batera hainbat agintari presente egon dira, profesional hauek bultzada emateko.

        Gabonart Azoka abenduaren 16tik urtarrilaren 5era bitartean egingo da. Egun Bilbokoa estatu mailan erreferente bihurtu da; izan ere, parte-hartzaile asko Euskal Herritik kanpo etorri dira. Arbasoren ustez, “Bilbo oso plaza garrantzitsua da. Egiatan, hiriak besoak zabalik hartzen gaitu, bertokoek artisautzaz ulertzen dute, eta, beraz, artisauek badakite harrera ona izango dutela”. Antolatzaileek haratago begiratzen dute, eta “horrelako ekimenek sektorearen beharra azpimarratzen dute eta Bizkaiko hiriburuko Gabonetako Azokaren ospea berresten dute” adierazi dute. Era berean, euskal kulturaren atal bat zabaltzen du, ekonomiaren dinamizazioa bultzatzen den bitartean.

        Gabonart bezalako hitzorduak oso garrantzitsuak dira sektorearentzat, batez ere bizi ditugun garai hauetan, gure artean krisi sozial eta ekonomikoa ezarri baita, eta hori gainditzea kostatzen ari da. “Azokak gure erakusleihorik nagusienetarikoak dira, gure merkaturatzeko modu nagusia” azpimarratu dute.

        Sustatzaileek baieztatu dute, “krisia ez da baretzen ari, baina, aldi berean eta arraroa dirudien arren gero eta artisau gehiago daude. Gure ustez, gizartearen pentsamendua aldatzen ari da eta asko dira beste bizimodu baten aldeko apustua egiten ari direnak, bere sormenean eta bere artean etorkizun profesionala bilatzearen alde. Hori dela eta, sektorea gaztetzen ari da eta. Egia da krisiaren ondorioz, tailer askok pertsiana itxi dutela, halaber, beste batzuk igo egin dute, itxaropen eta, batez ere, haize freskoa emanez sektoreari”.

        Gizartea artisautzari balio gero eta handiagoa ematen ari zaio. “Azkenean konturatzen gara eskuz egindakoak duen balioaz. Serieko produkzioetatik ihes egiten hasi ginen. Publikoak produktu ezberdinak eta originalak nahi ditu eta hori da artisau-lanak eskaintzen duena. Ez daude bi berdin eta ezaugarri hura ordainezina da”, berretsi du Arbasok.

         Euskal Herriko artisauen elkartearen helburu nagusia da sektorearen garrantzia agerian jartzen duten ekimen mota guztiak sustatzea, eta, dagoeneko, Bizkaiko hiriburuko Gabonetako Azokaren prestigioa berrestea lortu du. Era berean, ekitaldi horren bidez ez da bakarrik sustatzen artisautza merkaturatzea: gure kulturaren atal baten zabalkundea ere egiten da, eta ekonomia bera dinamizatzen da.